3.నీ విలువ నువ్వు తెలుసుకో

 

              నీ విలువ నువ్వు  తెలుసుకో

 ఎంటర్ ప్రెన్యురియల్ స్పిరిట్ ను మేల్కొలుపు:

 “ఎంత గొప్పస్థాయి వాళ్ళు అయినా నీతో పరిచయం కావాలి అనుకునేంత విలువైన వాడివి అయి ఉండు,నీతో స్నేహం చేయాలనుకునేంత గొప్పవాడివై ఉండు ”

ఏదైనా సాధించాలన్నా తపన ఉండాలి.అది సాధించేవరకు మనిషికి సంతృప్తి ఉండకూడదు.సాధించిన తరువాత అందులో కిక్ లభించాలి.అందులో ఆనందం లభించాలి.విజయం సాధించడంలో కొత్త లక్ష్యాలు నిర్దేశించుకుని వాటిని ఎంత త్వరగా వీలయితే అంత త్వరగా  సాధించడమనేది కార్యసాధకుని లక్షణం. ఒక కార్యసాధకుని వ్యక్తిత్వాన్ని బాగా ఒంట పట్టించుకోవాలి.అంకితభావం,పట్టుదల,క్రమ శిక్షణ,దైర్యం,ఆత్మ విశ్వాసం,సాహసం వంటి అద్భుతమైన లక్షణాలతో ఒక దాని తరువాత ఒకటి లక్ష్యాలను నిర్దేశించుకుని వాటిని సాధిస్తూ..అందులో అమితమైన ఆనందాన్ని పొందగలగాలి.

ఒక ఎంటర్ ప్రెన్యూర్ లా ఆలోచించడం అలవాటు చేసుకోవాలి.ఈ ప్రపంచంలో ఎంటర్ ప్రెన్యూర్ అంటే ఒక రియల్ హీరో. ఎంతో దైర్య సాహసాలతో ఎంతో రిస్క్ తీసుకుని ఎన్ని సమస్యలతో అయినా పోరాడే ఒక వ్యక్తి , స్పూర్తి ప్రదాత. మన జీవితంలో ఉండే సమస్యలను మనం అతిగా ఊహించుకుంటాం. ఒక్కసారి తమ జీవితాన్నే రిస్క్ లో పెట్టుకుని లక్ష్యం కోసం పని చేసేవాళ్ళను చూడండి.వాళ్ళు ఎంత పెద్ద సమస్యలను అధిగమించి సంస్థను  నడుపుతున్నారో అని ఆలోచిస్తే ఆశ్చర్యం వేస్తుంది.వాళ్ళ గట్స్ కి సెల్యూట్ చేయాలనిపిస్తుంది. అసలు మనదీ ఒక సమస్యేనా అనిపిస్తుంది.పిచ్చిగా సినిమా హీరో లను అభిమానిస్తూ..వాళ్ళు సినిమాలో వేసిన వెకిలి వేషాలు వేస్తూ సమయాన్ని వృధా చేసుకోకూడదు.రియల్ హీరో లను అభిమానించడం నేర్చుకోవాలి.వాళ్ళు అంత చేసినపుడు,ఎన్నో సాధించినపుడు వాళ్ళ స్పూర్తితో,ప్రేరణతో మనం అందులో ఒక పది శాతం చేసినా మన జన్మ ధన్యమైనట్టే.ఒక్క సారి మీలో ఉన్న ఎంటర్ ప్రెన్యురియల్ స్పిరిట్ ఇగ్నైట్ చేసుకుంటే అది ఏమి అసాధ్యం కాదు.ఒక అచీవర్ మైండ్ సెట్ తో జీవించాలి.ఏదో ఉద్యోగం చేసుకుందాం.అలా బ్రతికేస్తే సరిపోతుంది అనుకోకూడదు.మీలో పరిజ్ఞానం,నైపుణ్యాల కోసం ఉన్నతమైన గౌరవప్రదమైన ఉద్యోగాలు కొన్ని సంవత్సరాలు చేసినా..అవసరమైతే..మేము కూడా నిరంతర పరిశ్రమతో పరిశ్రమలు స్థాపించి నడిపించగలం అనే మానసిక స్థితిని పెంపొందించు కోగలగాలి.మన ఆలోచనల్లో, ఊపిరిలో ఆ స్పిరిట్ ఎప్పుడూ రగులుతూ ఉండాలి. హృదయం జవసత్వాలను నిత్యం కాపాడుకుంటూ..మేధో వికాసం మాత్రమే కాకుండా హృదయ వికాసం కలిగేలా ప్రయత్నం చేస్తూ ఉండాలి.నిత్య స్పూర్తిని పొందుతుండాలి.

 లక్ష్య సాధకులకే అత్యున్నత గౌరవం

ప్రతి ఒక్కరూ కూడా ప్రపంచానికి ఏదో ఒకటి అందివ్వగలరు.ప్రశ్న ఏంటంటే మనం అందరి విలువను గ్రహించే ,గౌరవించే సమాజాన్ని తయారు చేస్తున్నామా?

                                                                                      -మైఖేల్ టి. కో

మన లక్ష్యమే మనకు జీవితంలో అత్యంత ముఖ్యం.మన లక్ష్యం సాధించడానికే భగవంతుడు ఈ భూమ్మీద మనల్ని సృష్టించాడని అనుకోవాలి.ఎందుకంటే ఈ ప్రపంచంలో ఒక వ్యక్తికి అత్యున్నతమైన గౌరవం లభిస్తుంది అంటే అది ఒక లక్ష్యం ఏర్పరుచుకుని..దాన్ని సాధించడం వల్లనే.గొప్ప లక్ష్యాలు సాధించని వారికి ఈ ప్రపంచం విలువ ఇవ్వదు.నీకు ఈ ప్రపంచంలో విలువ లేనప్పుడు నీ మాటను ఎవరూ లెక్కచేయరు.పైగా నిన్ను చులకనగా చూస్తుంది.గొప్ప లక్ష్యాలను సాధించిన వారిని దాదాపు ఒక దేవుళ్ళుగా,ఒక అవతార పురుషులలాగా భావించి ఆరాధిస్తుంది..అందుకే ఈ లోకంలో గౌరవం పొందాలంటే మనిషి గొప్ప లక్ష్యాలను సాధించడం తప్పనిసరి.అందుకే మనిషి గొప్ప కలలను కనాలి.వాటిని నిజం చేసుకున్నప్పుడే మీకు గుర్తింపు,గౌరవం లభిస్తాయి.వివేకానంద  ఎవరికీ  తెలియనప్పుడు  అతన్ని  ఒక షావుకారు ట్రైన్ లో ప్రయాణం చేస్తున్నప్పుడు బ్రతకడం  తెలియక  స్వామిజీ   అయ్యాడని  పరిహసించాడు.సర్వమత సమ్మేళనం కోసం అమెరికా వెళ్ళినపుడు ఒక తెల్లవాడు అతని  అవతారాన్ని  వెక్కిరించాడు .ఒక్క సారి  చికాగో  సమావేశంలో  ప్రసంగించిన   తరువాత  అతని  గొప్ప తనాన్ని   అమెరికా  పత్రికలు  కీర్తించిన  తరువాత అతను  ప్రపంచానికే  ఆరాధ్యుడు అయ్యాడు అలా ఎందరో వాళ్ళ  కలలను నిజం  చేసుకోవడమే  కాదు.భారత  దేశానికి  ప్రపంచ  వ్యాప్తంగా  కీర్తి  ప్రతిష్ఠలు తీసుకువచ్చారు. అబ్దుల్ కలాం   అనే  శాస్త్రజ్ఞుడు, మహనీయుడికి  దేశమంతా  సలాం  కొట్టింది.ఆ  మహనీయుడు  బోధించిన  మహా  సూత్రం  ఒకటే .. “కలలు  కనండి -వాటిని  సాకారం  చేసుకోండి “

 నీ జీవితానికి సంపూర్ణ బాధ్యత నీదే

 “ జీవితానికి మనం సంపూర్ణ బాధ్యత తీసుకున్నపుడే..జీవితంలో దేన్నైనా మార్చుకోగల శక్తులను పొందగలుగుతాము.”

మన జీవితం అందరిలాగా మనం అనుకున్నవన్నీ సులభంగా చేసే పరిస్థితులు,ముందుకు నడిపించే వ్యక్తులు ఉండకపోవచ్చు.కానీ నువ్వు ఉన్న పరిస్థితులు అన్నింటినీ అంగీకరించి..నీ జీవితానికి నువ్వే సంపూర్ణ బాధ్యత తీసుకుని దైర్యంతో,ఆత్మ విశ్వాసంతో జీవితాన్ని ఎదుర్కోవాలి. ఎవరు ఏం చేసినా ఏది ఎలా జరిగినా నీ జీవితంలో జరిగే ప్రతి సంఘటనకు సంపూర్ణ బాధ్యత తీసుకోవాల్సినది నువ్వే.నీ జీవితం కోసం పోరాడాల్సింది నువ్వే.ఈ ప్రపంచానికి నువ్వంటే ఏమిటో నిరూపించుకోవాల్సింది నువ్వే.

నీలోనూ ఏదో ఒక ప్రత్యేకత ఉంటుంది.నీలో ఎవరికి లేని ఒక అరుదైన గిఫ్ట్ ఉండవచ్చు.దాన్ని పట్టుకో..ఒకవేళ నువ్వు పేదవాడివైనా, నువ్వు ఎలాంటి పరిస్థితుల్లో పెరిగినా..అది నిన్ను ఈ ప్రపంచం నువ్వు సామాన్యుడివి కాదు నువ్వు ఒక అసామాన్యుడివి అని భావించేలా చేస్తుంది.నువ్వే  నీ ఆయుధం.అందరూ కోటీశ్వరులు కాకపోవచ్చు.కానీ నీ కంటూ ఒక గుర్తింపు తెచ్చుకోవడానికి నీలో ప్రతిభ ఉంటే చాలు.ఏ కొలమానాలకు అందని ప్రతిభ మనిషి అంతరంగంలో ఉంటుంది అని గ్రహిస్తే..ఆత్మ న్యూనతకు తావులేని, ఆత్మాభిమానాన్ని తాకట్టు పెట్టలేని వ్యవస్థలలో  పిరికి వాడివైతే తప్ప బ్రతకలేని వ్యవస్థలనుంచి బయటపడి మనశ్శాంతితో బ్రతకవచ్చు.

 బలమైన కోరికే భగవంతుని స్వరూపం:

“గెలుపు కోసం ఉన్న బలమైన కోరిక ఓడిపోతాననే అంతర్గత భయాన్ని అధిగమించినపుడు..మనిషి జీవితంలో ఏం కోరుకున్నా పొందగలడు.ఏం అనుకున్నా సాధించగలడు”

దేన్నైనా కోరుకుంటే బలంగా కోరుకో.బలహీనమైన కోరికలతో ఏమి సాధించలేము.బలమైన కోరిక అంటే..కోరుకున్న దాన్ని పొందటానికి ఎన్ని త్యాగాలనైనా చేయాలి.ఎంత కష్టమైనా పడాలి.ఎంత బాదైనా అనుభవించాలి.బలమైన కోరిక అనేది చాలా ముఖ్యమైనది.అది ఉన్నప్పుడే మనం కృషి చేసి కోరినది పొందటానికి అర్హత సంపాదించుకోగలం. అన్ని  అనుకూలంగా ఉన్నప్పుడు  సాధించడంలో  అంత గొప్ప తనం  ఏం  ఉంటుంది  మిత్రమా .. నీకు ఎప్పుడైనా పరిస్థితులు ప్రతికూలంగా ఉన్నప్పుడు కూడా ఏదైనా  సాధించి  చూడు.అప్పుడు  ఎంత  మందికి  నువ్వు  స్ఫూర్తినిస్తావు అనేది  నీకు  ప్రత్యక్షంగా  తెలుస్తుంది.కటిక  పేద  వాళ్ళు  ,కాళ్ళు  లేనివాళ్లు ,కళ్ళు  లేని  వాళ్ళు  కసితో  కృషి  చేసి  ఎన్నో  అద్భుతాలు  చేస్తున్నారు .నీకు  చాలా  మంది  కంటే  మెరుగైన  సౌకర్యాలే  ఉన్నాయి.ఎంతో మంది  కంటే  నీకు  మెరుగైన  వాతావరణమే  ఉంది .ఐనా  నువ్వు చేయలేకపోతున్నావంటే..నీలో  కసి  లేదు  అని  అర్ధమవుతుంది.చేప  పిల్ల  నీళ్లలో లేనప్పుడు  ఎంత తపిస్తుంది?  నీ  లక్ష్యం  కోసం  నువ్వు  అంత తపిస్తున్నావా ? ఎన్ని  నిద్దరలేని  రాత్రులు  మెలకువతో  కృషి  చేస్తే వాళ్ళు  కన్న కలలు నిజం  అయ్యాయో తెలుసా? ఒక్క సారి లక్ష్య సాధనలో దిగిన తరువాత రాజీ పడకుండా కష్టపడుతున్నావా? రాజీ పడడం అనేది ఉన్నప్పుడు ఇంక కలలు కనడంలో అర్ధమేమి ఉంటుంది?అందుకే ..రాజీ అనే పదానికి మన కలల విషయంలో చోటు ఉండకూడదు.

 ఆత్మ న్యూనత ను జయించే మార్గం

 “నిన్ను నువ్వు ఒకరి కన్నా తక్కువగా అంచనా వేసుకుని ఆత్మ న్యూనత భావన పొందే ముందు నువ్వు నీ విలువ తెలియని తెలివి తక్కువ వాళ్ళ మధ్యలో ఉన్నావేమో ఒక్కసారి గమనించు”

మన జీవితంలో రెండు రకాల వ్యక్తులుంటారు.ఒకరు మన జీవితంలోని సమస్యలకు పరిష్కారాన్ని చూపేవారు.రెండు మన జీవితంలో సమస్యను సృష్టించేవాళ్ళు.మనిషి ఎలాంటి సమస్యనైనా కష్టపడి జయించవచ్చు.మేధస్సు కోసం కష్టపడి ఉన్నత చదువులు చదవవచ్చు.నైపుణ్యంతో,అనుభవంతో ఉన్నత ఉద్యోగాలు సాధించి మెరుగైన సంపాదన పొందవచ్చు కానీ జీవితంలో ఉన్నటువంటి కొంత మంది అర్ధంకాకుండా..మనకు ఏ మాత్రం సహకారం అందించకుండా..వాళ్ళ కోణం నుంచే  ఆలోచిస్తూ..వాళ్లకు నచ్చిన విధంగా ప్రవర్తిస్తూ..మనకు మనశ్శాంతి లేకుండా చేసే వాళ్ళను మీరు ఎంత పెద్ద స్థాయికి వెళ్ళినా తప్పించుకోలేరు.మనుషుల గురించి తెలుసుకోకుండా వాళ్ళ ఆస్తి పాస్తులను చూసో..అంతస్తులను చూసో..మన జీవితంలో వారికి స్థానం ఇవ్వడం వల్ల వాళ్ళు సమస్యగా పరిణమించడం మనం చూస్తూనే ఉంటాం.కొంత మంది విమర్శలను వ్యక్తిగతంగా తీసుకోవడం , వేరే వాళ్ళ ఆధిక్య ధోరణి అంటే మాట్లాడేటప్పుడు ఒక నేను నీ కన్నా ఎక్కువ తెలిసిన వాడిని ,ఎక్కువ స్థాయి వాడిని అనేది టోన్ ఆఫ్ వాయిస్ ప్రతిబింబించడం వలన కూడా ఆత్మన్యూనత పొందుతుంటారు.అలాంటి వాళ్ళు మన వ్యక్తిగత జీవితంలో బంధువులుగా ఉండవచ్చు,వృత్తిగత జీవితంలో తోటి ఉద్యోగులుగానైనా ఉండవచ్చు. నిజానికి ప్రతిఘటించనంత కాలం అలా మనల్ని మనం ఒకరికంటే తక్కువ అనే భావన తో  లేక అవసరం కోసం భయంగా బ్రతకాల్సిందే.

“ఎదుటివారు మనతో ప్రవర్తించేటపుడు దేన్ని అనుమతించాలి,అంగీకరించాలి అనేదే ఎదుటి వారు మనలని ఎలా చూడాలి అనే దాన్ని ప్రామాణికంగా చెప్పినట్టు అవుతుంది”

 ఎవరి జీవితం వారికి విలువైనది.ఎవరి సమయం వారికి విలువైనది.మన సమయాన్ని విలువైన వ్యక్తుల కోసం కేటాయించాలి తప్ప..ఎవరికి పడితే వారికి మన సమయాన్ని ఇవ్వకూడదు.

 నీ విలువ నువ్వు తెలుసుకో..

“నువ్వు దేన్ని పొందుతున్నావు,ఇంకా జీవితంలో ఎంత గొప్ప విషయాలను పొందటానికి అర్హత కలిగి ఉన్నావు అనేది నీకు తెలియాలంటే నీ విలువ నువ్వు తెలుసుకోవాలి”

బంగారం,వజ్రం మాత్రమే కాదు దారి వెంట పోయేటపుడు ఉన్న పూవు కూడా విలువైనదే.అది మనసుకు ఆనందాన్ని,ఆహ్లాదాన్ని కలిగిస్తుంది. జీవితంలో ఉన్నత శిఖరాలు మాత్రమే కాదు ఒక చిన్న పసిపాప నవ్వు కూడా విలువైనదే.ఈ లోకంలో ఎక్కడా దొరకని ఒక నిర్మలమైన,నిష్కల్మషమైన ఒక స్వచ్చమైన ప్రేమను పరిచయం చేస్తుంది.నువ్వు వజ్రం కాకపోవచ్చు..కానీ సుగంధాన్ని పంచే పువ్వు కావచ్చు.నువ్వు ఉన్నత శిఖరం కాకపోవచ్చు,నువ్వు పసిపాప పెదవులపై చిరునవ్వు కావచ్చు.ఏదైనా లోకంలో నీ విలువ నీదే,నీ గొప్పతనం నీదే.పోలికలతో ఆత్మ న్యూనత పెంచుకుని నీ ఎదుగుదల ను నువ్వే అవరోధం చేసుకుంటే..నువ్వు అవకాశాన్ని పొందలేవు.నీ విలువ తెలుసుకుని ఆత్మ గౌరవం తో కూడిన, ఆత్మ విశ్వాసంతో ముందుకు సాగాలి.అలాగని అహంకారంతోనూ ప్రవర్తించకూడదు.గొప్ప వాళ్ళ అందరితోనూ కలిసి మెలిసి ఉంటే..వాళ్ళ స్నేహ సుగంధం వల్లనైనా మన వ్యక్తిత్వం,ప్రతిభ మెరుగుపడి మనం వారంతా కాకపోయినా కొంతైనా సాధించవచ్చు.గొప్ప వాళ్ళందరిలో మనం ఒకరం కావాలి అనుకోవాలి కానీ మనమే అందరి కన్నా గొప్ప అని అనుకోకూడదు.పోల్చుకోకుండా..నిన్ను ఒక ప్రత్యేక వ్యక్తిగా నిలబెట్టే నీ వ్యక్తిత్వాన్ని,నీలోని ప్రత్యేకతను కోల్పోకుండా జీవిస్తే..నీ విలువ నువ్వు తెలుసుకున్నట్లే.